Карлос Алкарас е елиминиран од УС опен откако во полуфиналето беше поразен со 3:1 од рускиот тенисер Даниил Медведев, кој на тој начин се пласираше во големото финале каде ќе игра против Новак Ѓоковиќ.
Шампионот од пред две години победи во сетови со 7:6 (3), 6:1, 3:6, 6:3, по речиси 3 и пол часа одличен тенис на централниот терен во Њујорк.
Првиот светски рекет важеше за голем фаворит на овој дуел, пред сѐ поради позицијата на АТП листата, но и поради тоа што излезе како победник во последните два дуела меѓу овие играчи.
Медведев на овој меч се трудеше што повеќе тој да го диктира темпото, да биде агресивен и нападно ориентиран. Презеде многу ризици, па не е чудно што имаше 9 асови и 10 двојни грешки.
Сепак, нереално беше да се очекува дека популарниот Карлитос туку така ќе се откаже по губењето на првите два сета. Првиот брејк во мечот го направи на почетокот од третиот сет, го одбрани и потоа го намали резултатот.
Шпанецот пропушти клучни шанси во третиот гем од четвртиот сет, имаше две брејк топки на сервис на ривалот, но не ги искористи.
Казната дојде во маратонскиот шести гем, кога Даниил направи брејк, го приведе мечот кон крајот и се пласираше во големото финале кое ќе се игра в недела.
Во второто полуфинале, српскиот тенисер Новак Ѓоковиќ не се мачеше премногу против сензацијата на турнирот, Американецот Бен Шелтон.
Србинот победи со максимални 3:0, во сетови беше 6:3, 6:2, 7:6 (4), за нешто повеќе од 2 и пол часа игра, со што се пласираше во своето јубилејно 10-то финале, во кое ќе брка рекорден 24-ти Грен слем.
Финалето на последниот Грен слем во сезоната на УС опен е закажано за в недела во 22 часот по наше време. Во победи води Ѓоковиќ со 9:5.
