Шпанскиот возач Фернандо Алонсо (37) ќе се збогува од Формула 1 во Абу Даби, но веќе порача дека трката веќе не му е интересна.
„Ова веќе не е таа Формула 1 поради која сакав да станам возач на трки. Заминувам бидејќи веќе е здодевно. Повеќе се зборува за тоа што се случува покрај стазата, за полемиките и за радиопораките“, изјави двократниот светски првак.
Алонсо заминува по 312 трки, разочаран од промените на правилата, но и поради фактот дека Формула 1 станала предвидлива.
„Сега можам однапред да ги напишам првите 15 позиции за следната трка, со неколку промашувања. Тешко ми е да прифатам дека сѐ стана толку предвидливо. Изгледа повеќе задоволство ми претставува да возам во други автомобилски серии. Тие нови правила однесоа сѐ во погрешен правец. Веќе не се важни тактиката и креативноста. Сите имаат исто количество на гориво, исти гуми, иста тежина... тоа им помогна само на помалку талентираните возачи“, рече Шпанецот кој паралелно настапува за Toyota во трките на издржливост во FIA.
Местото во Формула 1 му го препушта на 19-годишниот Ландо Норис кој се очекува да го предводи McLaren.