Бразилската вселенска агенција извести дека бројот на пожари кои ја зафатија Амазонската прашума, како последица од сечењето на шумите, во однос на минатата година е пораснат за 83 проценти.
Институтот ги собра податоците со помош на сателити, а ги објави по една недела откако претседателот на Бразил го отпушти шефот на оваа институција поради објавувањето податоци за сеча на шумите, пишува BBC.
Густ чад од пожарот се надви над Сао Паоло во понеделникот, кога среде бел ден завладеа целосна темнина. Тоа се случи бидејќи силниот ветер го донесе чадот од местата оддалечени повеќе од 2.700 километри од Сао Паоло.
Амазонската прашума, најголема во светот, е клучна во борбата против глобалното затоплување. Активистите за зачувување на средината го обвинуваат претседателот Жаир Болсонаро, тврдејќи дека ги поттикнувал дрвосечачите да ја пустошат шумата.
За помалку од една недела забележани се повеќе од 9.500 пожари. Според податоците на Националниот институт за вселенски истражувања годинава во бразилскиот дел на Амазонската прашума избиле повеќе од 72.000 пожари.
