Апелациониот суд по вторпат ја укина пресудата на Кривичниот суд за предметот „Змиско око 2“ и предметот го врати на повторно судење во Основниот суд.
Судот ги прифатил жалбите на 53 обвинети и делумно ја уважил жалбата поднесена од Основното јавно обвинителство за гонење организиран криминал и корупција.
„Апелациониот суд постапувајќи по изјавените жалби одржал јавна седница на ден 19.02.2016 и 22.02.2016 година по која утврдил дека во првостепената пресуда нецелосно е утврдена фактичката состојба, односно дека обжалената пресуда во осудителниот и ослободителниот дел од став I точка 1 и став III содржат недостатоци поради кои не може во целост да се провери нејзината правилност, а изреката на пресудата е недоволно јасна, заради што Апелациониот суд ги уважил жалбите и предметот го врати на повторно судење со напатствија да се отстрани недостатоците. Во однос на жалбата на обвинителството за осудителниот дел од став I, на пресудата Апелациониот суд сметал дека таа е беспредметна“, се вели во соопштението на Основнит суд Скопје 1 каде Апелациониот суд ја доставил пресудата.
