Печени во рерна со ароматичен прелив, за годинашниов Свети Никола подгответе посочни и повкусни посни сарми.
На посната трпеза за Свети Никола, како слава или именден, едноставно мора да се најдат и сарми, покрај риба и тавче гравче. Киселата зелка за овој празник не се полни со мелено месо, туку со ориз, а нашиот е предлог е фил кој на сите ќе им се допадне. Покрај оризот, додатете и ореви, лосос и морков. Уште подобро е што сармите не се крчкаат на шпорет, туку само се печат во рерна и на тој начин ќе бидат посочни, а за подобриот вкус заслуга има и ароматичниот прелив од вода, лукче и блага пипер.
Потребни состојки:
- 2 кромида
- 2 праза
- 1 морков
- 100 гр ориз
- 450 гр мелени ореви
- 100 гр димен лосос
- 1 лажичка блага пипер
- 1 лажичка вегета
- 3 чешниња лук
- кисела зелка
- сол
- бибер
Подготовка:
Кромидот и празот ситно исечкајте ги па пропржете ги на масло. Кога ќе омекнат додадете и сечкан морков. Посолете. Потоа додадете го и измиениот ориз и добро измешајте. По две минути додадете ги и мелените ортеви, па зачинете со вегета и бибер. Добро промешајте и тргнете од шпорет. Додадете го сечканиот лосос и повторно добро соединете. Киселата зелка исчистете ја, измијте ја и ставете ја да отстои во млака вода околу 30 минути. Потоа листовите полнете ги со филот како што секогаш правите. Редете ги во намастена тепсија и сипајте од преливот кој што го направивте така што сте ги измешале мелениот лук, водата и благата пипер. Печете на 200°C околу половина час.
Овој Свети Никола ќе има поубава арома.
