Ултраспортскиот автомобил AM-RB 001, што Aston Martin го развива заедно со Red Bull Racing треба да добие V12 мотор, 1.000 коњски сили и максимална брзина над 400 километри на час. Британската компанија досега не отрки многу детали за овој проект, во кој покрај со Red Bull Racing работи и со познатиот британски инженер Адријан Њуи кој веќе долго време работи на развој на Ф1 болиди.
Сега директорот на одделот за дизајн во Aston Martin, Марек Рајхман откри нови детали за кој зборуваат дека ќе биде примерот според кој ќе се развиваат идните суперавтомобили.
Рајхман потврди дека автомобилот ќе развива 402 километри на час, а во свиоците на возачот и на неговиот сопатник ќе им покаже како изгледаат г-силите што ги чувствуваат возачите на Формула 1.
Aston Martin AM-RB 001 ќе добие централно поставен атмосферски V12 мотор со зафатнина меѓу 6 и 7 литри кој ќе располага со 1.000 коњски сили, а поширокиот агол меѓу цилиндрите ќе му овозможи пониско тежиште на автомобилот. Силата ќе се пренесува преку секвенцијалниот менувач Xtrac, а ќе го има и системот KERS кој за прв пат беше употребен во болидите на Ф1.
Најавите на Рајхман се дека AM-RB 001 ќе добие минимални измени во однос на веќе претставениот концепт, а поврзани се со подобрување на системот за ладење и уште подобрата аеродинамика.
Една интересна опција е што секој модел ќе има индивидуално прилагодување на возачката позиција. Тоа значи дека во Aston Martin на секој возач индивидуално ќе му ја подесат позицијата на седиштето, на педалите и на управувачот според конституацијата на телото, а такви работи досега правеа само за тркачките автомобили.
Компанијата ќе произведе 150 примероци од AM-RB 001, а сите се веќе распродадени по цена од 2,82 милиони евра. Во случај некој да се премисли, постои листа од стотици потенцијални купувачи што не го букирале својот примерок на време.
Првите испораки се планирани за крајот на 2018 година, а Aston Martin паралелно со верзијата што ќе биде легална за возење на јавните патишка, ќе направи и 25 модели што ќе може да се користат само на тркачка патека.
Конечното име на AM-RB 001, компанијата се уште не го открива.