Авионот на египетската авиокомпанија Egypt Air, кој во мај се урна во Средоземното море, најверојатно се распаднал во лет заради пожар во кокпитот или околу него, пренесе денеска американскиот весник New York Тimes.
Не е познато дали пожарот избувнал заради механички дефект или бил подметнат, наведува весникот, повикувајќи се на изјава на еден анонимен египетски функционер.
Истражната комисија, што ја предводат египетските власти, соопшти во сабота дека црната кутија го снимила зборот „оган“, а истражителите уште кон крајот на јуни наведоа дека анализата на втората црна кутија на која се забележани детали од летот, покажала дека алармите за пожар се активирале непосредно пред падот на авионот.
Авионот од типот Airbus 320, што леташе од Париз кон Каиро, се урна на 19 мај во Средоземното море, меѓу грчкиот остров Крит и египетскиот брег, откако ненадејно исчезна од радарот. Во несреќата загинаа 66 лица.
Кон крајот на октомври во експлозија на бомба во авион со руски туристи, непосредно по полетувањето од египетското летувалиште Шарм ел шеик, загинаа 224 патници и членови на екипажот, а одговорноста за нападот ја презеде исламска држава.
Во случајот со авионот на летот од Париз за Каиро, претпоставката за терористички напад е исклучена заради веројатноста дека станува збор за пожар и фактот дека никој не презеде одговорност.