Американската Администрација за безбедност во сообраќајот (NHTSA) отвори истрага за системите на Tesla Model S откако еден возач загина додека бил вклучен делумно-автономниот автопилот во автомобилот. Случајот е прв во кој е вклучен автомобил Tesla Model S со систем за делумно-автономно возење, а кој има трагичен епилог.
Несреќата која се случила на чист сончев ден откако шлепер свртел пред Model S, ќе ја разгори дебатата во автомобилската индустрија и во правната сфера, за системите кои нудат автономно возење.
Производителот на луксузните електрични Tesla автомобили изјави дека ниту автопилотот ниту возачот не ја забележале белата приколка на камионот, па автомобилот воопшто не сопирал. Бидејќи приколката била висока, Model S поминал под неа, а во несреќата настрадал возачот.
Tesla нагласува дека ако имало судар со предниот или задниот дел на автомобилот, дури и при високи брзини, системот ќе спречел сериозни повреди. Исто така нагласуваат дека за да се активира, возачот мора да прифати дека тие се одговорни за возењето.
„Ова е многу слично како автопилотот кај авионите. Тие ја намалуваат работата на пилотите и ја зголемуваат безбедноста, но не треба безбедното летање целосно да се потпира на автопилотот без човечка контрола“ - изјави Елон Маск.
Со оглед на тоа дека повеќе автомобилски брендови во моментот работат на делумно автономни и автономни системи, оваа несреќа предизвика загрижувачки реакции. Сепак, извесно е дека овој инцидент ќе предизвика и дополнителни вложувања и истражувања за да се подобри автопилот функцијата кај автомобилите.
