Советот за безбедност на ОН едногласно донесе резолуција со која се бара заштита на болниците во воените зони, силно осудувајќи ги нападите врз здравствените установи.
Резолуцијата што ја предложи Нов Зеланд е изгласана само неколку часа откако сириските бунтовници ја погодија болницата во Алепо, убивајќи најмалку тројца луѓе. Минатата недела беа погодени и болници во делови на Алепо што се под контрола на бунтовниците.
Во резолуцијата се истакнува дека нападите врз болниците се кршење на меѓународното хуманитарно право.
Генералниот секретар на ОН Бан Ки-мун, кој се обрати на СБ по гласањето, осуди повеќе од 360 напади врз околу 250 здравствени установи од почетокот на војната во Сирија.
Тој предупреди дека болниците се мети на напади ширум светот, вклучувајќи ги Јемен, Ирак и Јужен Судан. Во бомбардирање од страна на американските сили во октомври минатата година беше уништена болница во Авганистан.