Со синоќешната висока победа над Сан Марино репрезентацијата на Белгија стана прва која се пласираше на претстојното Европско првенство.
Белгијците имаа лесна задача против најслабата европска репрезентација и славеа убедлива победа од 9:0. Ромелу Лукаку постигна два гола и дојде до бројка од 51 репрезентативен гол, по еден гол постигнаа Насер Шадли, Тоби Алдервејрелд, Јури Тилеманс, Кристијан Бентеке, Јари Версхарен и Тимоти Кастањ, а автогол си постигна Кристијан Броли.
Во останатите натпревари од истата група, Кипар го изненади на гости Казахстан славејќи победа од 2:1 и тоа со пресврт, додека Русија лесно излезе на крај со Шкотска победувајќи со 4:0.
На три кола до крајот во групата И Белгијците имаат максимален скор од 7 победи и веќе обезбедија пласман на ЕУРО кое ќе се игра во јуни 2020. Нив најверојатно ќе ги следи Русија на која в недела ѝ треба само бод против Кипар за заверување на пласманот.
Моментална табела:
1. Белгија 21
2. Русија 18
3. Кипар 10
4. Казахстан 7
5. Шкотска 6
6. Сан Марино 0