Германскиот премиум гигант BMW ќе се обиде да се приклучи на пазарот на кој во моментов доминираат компании како Lamborghini, Ferrari и Porsche. Се работи за пазарот за хибридни суперавтомобили, а гласините велат дека BMW подготвува автомобил кој ќе биде директна закана најпопуларен во оваа класа.
Autocar пренесува дека BMW има намера да направи замена на актуелниот модел i8 и да го развива во нивниот престижен оддел M, наменет за спортски автомобили.
Новиот BMW би требало да пристигне во 2023 година и да им конкурира на моделите како што се Porsche 911 Turbo, McLaren 570S и ним сличните.
„Кога си инженер, посакуваш барем еднаш во животот да добиеш шанса да направиш супер-спортски автомобил. Мислам дека делумната електрификација би можела да го овозможи тоа“, рече Клаус Фролич, член на одборот на BMW задолжен за развој на производи.
Иако засега е рано да се зборува за детали, се очекува дека суперавтомобилот на BMW би имал најмалку 700 коњски сили, што ќе го направи за 100 коњски сили помоќен од идниот M8, а ќе биде и поскап од моделите GT и i8.
Хибридниот погон и лесната конструкција ќе бидат првите чекори кон електричната иднина на одделот BMW M, а иако хибридните автомобили се продаваат многу добро, сепак крајната цел на германската компанија е да направи автомобил кој не емитува штетни гасови.
