Популарната буквa „M" на BMW кончно стана дел и од 7 Series. Станува збор за моќниот BMW M760i xDrive модел кој со цената од 168.090 евра во Германија, е најскапиот BMW автомобил во моментот.
Овој модел во моментот е на врвот на понудата на BMW и големи се шансите дека ќе остане најскапиот автомобил на баварската компанија се до 2019 година кога треба да се појави луксузниот SUV модел X7.
За високата цена на М верзијата на Series 7 купувачите ќе добијат беспрекорен луксуз, како и спортски перформанси од 6,6 литарскиот бензински би-турбо V12 мотор со 610 коњски сили и 800Nm максимален вртежен момент.
Автомобилот кој има погон на сите четири тркала, забрзува од 0-100 километри на час за само 3,7 секунди и развива електронски ограничена максимална брзина од 250 километри на час. Со дополнителниот M Driver пакет, максималната брзина може да биде 305 километри на час.
M760i xDrive се нуди само со зголемено меѓуоскино растојание со кое доаѓа целиот луксуз што BMW може да го понуди на купувачите.
Како дополнителна опција се нуди и пакетот Excellence со кој доаѓаат поинакви 20 инчни тркала, повеќе хромирани детали на каросеријата и повеќе дрвени панели во внатрешноста. Исто така, за зголемување на комфорот на патниците, пакетот Excellence делумно го пригушува звукот на издувниот систем, а на каросеријата ги нема ародинамичните M компоненти.
