Македонскиот фудбал доби уште еден претсавник на Чизмата откако денеска Бобан Николов пристигна на медицински прегледи во таборот на второлигашот Лече.
Репрезентативниот играч од средниот ред се очекува утре да биде промовиран како ново зимско засилување на Лече, тим кој сезонава се натпреварува во Серија Би откако лани испадна од А.
Николов, чиј договор со унгарскиот тим Фехервар истекува во јуни, во Лече доаѓа за отштета која засега е непозната. Неговата пазарна вредност според Transfermarkt е 750 илјади евра.
Бобан е дете на штипска Брегалница, а уште како млад замина за Романија каде настапуваше за академијата на Георге Хаџи пред да се пресели во Вииторул. Од 2015 беше во Вардар со кој играше и во групите од Лига Европа, а зимата 2018 отиде во унгарскиот Фехервар од каде сега заминува по двегодишен престој.
Лече денеска го промовираше младиот Данец Мортен Хјулманд, кој игра на истата позиција како и нашиот Николов, односно дефанзивна средина. Денеска пристигна и ветеранот дефанзивец Фабио Пизакане, кој како и Николов, треба да биде претставен утре. Клубот прави напори да состави добар тим за продолжението од сезоната бидејќи е со амбиции експресно да се врати во Серија А. По 18 кола Лече е 5-ти на табелата со 8 бодови помалку од лидерот Емполи. Првите два тима одат директно во А, додека третиот ќе се одлучи со бараж.
Македонската колонија во Италија сега се зголеми на петорица, но во Лече Николов има друштво бидејќи од летоска таму стандарден првотимец е латералниот бек Леонард Жута. Тој е и поранешен соиграч на Николов од репрезентацијата на Македонија, но веќе две години не е на списокот на селекторот Ангеловски.
Шанса за деби во жолто-црвениот дрес Николов ќе има веќе в недела кога Лече го пречекува токму Емполи.
