„Ова што се случува на студот и снегот покажува тотална негрижа од досегашната власт кон граѓаните, бидејќи ги остави институциите со врзани раце поради криминалните и тендер политики за свои интереси“, обвини Благој Бочварски, претседател на Комисијата за транспорт и врски и член на извршниот одбор на СДСМ.
„Се случија стотици сообраќајни незгоди, верижни судири, има повредени граѓани, големи материјални штети. Загрозена е безбедноста на граѓаните. Еве зошто е тоа така: Власта во заминување издвојува најмалку средства во регионот за тековно и зимско одржување на патиштата. Само 3.300 евра по километар! Како споредба Србија издвојува триста проценти повеќе – 9.000 евра по километар. Босна и Херцеговина 7.700 евра по километар“, рече Бочварски.
Според него, институциите немаат соодветна механизација за да ги одржуваат патиштата во зимски услови.
„Снегот се расчистува со 100 проценти застарена механизација! Освен што се стари возилата, јавните претпријатија располагаат со многу мал број возила. Поради тоа ангажираат други приватни фирми, но и тие, според нашите информации што ги имаме, имаат стари и дотраени возила“, рече Бочварски.