Би помислиле дека оваа година не може да биде полоша за компанијата Boeing. Но, откако нивниот авион ненадејно „пропадна“ среде лет за Нов Зеланд, при што беа повредени десетици патници, а откако пилотот привремено ја загуби контролата над леталото, се чини дека може, пишува CNN.
Пилотот сепак успеа безбедно да слета, но сè уште не е јасно што го предизвика толку драматичниот пад во воздухот на авиуонот Boeing 787 Dreamliner (фото) на чилеанската компанија LATAM Airlines на летот од Австралија до Нов Зеланд.
Boeing објасни дека го истражува случајот и работи на собирање информации, но тоа не е нешто што сакате да го слушнете по серијата пропусти и скандали што ја снајдоа компанијата, коментира CNN.
Серијата лоши вести за Boeing почна во првиот викенд од оваа година, кога дел од 737 Max на Alaska Airlines падна по полетувањето. Прелиминарната федерална истрага покажа дека Boeing најверојатно не ги поставил завртките на вратата од која паднал делот.
Тој инцидент резултираше со привремено приземјување на авионите 737 Max низ цел САД, проследено со конгресни сослушувања, одложување на производството и испораката, повеќе федерални истраги, вклучително и кривична истрага, и голем пад на акциите на Boeing, кој изгуби четвртина од својата вредност оваа година, намалување на пазарната вредност на компанијата за повеќе од 40 милијарди долари.
Но, лошите вести не застанаа тука. Во февруари, пилотите на 737 Max на United Airlines објавија дека контролите на авионот не функционирале додека авионот слетувал. Пред две недели, Федералната управа за авијација (ФАА) идентификуваше безбедносни проблеми со системите за одмрзнување на моделите 737 Max и 787 Dreamliner кои може сериозно да ги оштетат моторите. Засега ФАА дозволи авионите да продолжат да летаат, а Boeing соопшти дека тоа не претставува безбедносен ризик.
ФАА, исто така, тврди дека сметаат дека системот за работа и управување во Boeing е хаотичен и непрофесионален. Велат дека проблемот не е само во документацијата, туку и во целиот менаџерски синџир и самата работа. Тие му наложија на Boeing да претстави план за решавање на проблемите со производството до крајот на мај.
„Врз основа на ревизијата на ФАА, нашите неуспеси во квалитетот и неодамнешниот извештај на експертската комисија, продолжуваме да спроведуваме непосредни промени и развиваме сеопфатен акционен план за зајакнување на безбедноста и квалитетот и градење доверба со нашите клиенти и патници“, велат од Boeing.
„Фокусирани сме на преземање значајни активности со транспарентност на секој чекор“, велат тие.
Акциите на Boeing паднаа за 3% синоќа по веста за летот за Нов Зеланд, а денеска паднаа за уште 4,5%. Тоа е втор најлош резултат на берзата, зад Tesla.
Но, ужасниот почеток на Boeing во 2024 година не е само прашање на вредноста на акциите, туку и прашање на углед. Враќањето на довербата на авиокомпаниите, регулаторите и патниците станува сè потешко со секој нов инцидент и надзор.
