Врховниот суд на Шпанија донесе пресуда деветтемина Каталонци одговорни за референдумот за отцепување од Шпанија од 2017 година да добијат затворска казна од 9 до 13 години.
Девет од обвинетите беа обвинети за бунт за што можеше да добијат казна до 25 години, но Судот одлучи дека прекршоците сепак не биле до таа мера иако имало „непобитни докази за насилство“ есента 2017 во Каталонија.
Највисока казна од 13 години доби Орио Жункерас, Лидер на Каталонската републиканска левица и поранешен заменик-премиер на Каталонија. Поранешните владини членови Раул Ромева, Жорди Туриљ и Долорс Баса добија 12 години. Десет и пол години добија членовите на кабинетот Жусеп Руљ и Жоаким Форн за неовластена употреба на парични средства, 11 и пол години доби спикерот во парламентот Карме Форкадељ, додека Жорди Санчес и Жорди Куичарт добија 9 и пол години како лидери на движењата за независност, ANC и Ómnium. Тројца беа ослободени од обвинението.
И покрај „поблагите“ казни, Шпанија уште еднаш докажа дека демократијата во земја не ец еднаква за сите и продолжува да ги користи сите можни начини за угнетување на каталонскиот народ кој е под шпанска окупација од 1714. Според шпанските закони, Каталонците немаат право на самопределување.
Каталонските осуденици за време на судењето се изјаснија дека не се чуствуваат виновни и дека им се суди од политички причини. Партиите кои и натаму се залагаат на долговековната желба за независност на Каталонија ги повикаа жителите на граѓанска непослушност доколку нивните лидери не се ослободат.
Меѓу осудениците не е поранешниот премиер Карлес Пуигдемонт кој сега живее во егзил во Белгија. Оттаму тој твитна за пресудата и повика на граѓанска непослушност: „Вкупно 100 години затвор. Варварство. Сега повеќе од било кога е на вас самите и вашите фамилии. Реагирајте како никогаш до сега. За иднината на нашите синови и ќерки. За демократијата. За Европа. За Каталонија“.
Каталонците одамна по мирен пат пробуваат да ја добијат назад својата држава, но немаат поддршка ниту од Европската унија која навидум се залага за демократија. Одлуката на шпанскиот Суд се очекува да предизвика нови масовни протести.