Се предвидува дека Кина и САД ќе имаат најмногу корист ако Велика Британија излезе од ЕУ без договор.
Тоа е така бидејќи Европа ќе остане „скршена“ по „разводот“ од Британија, вели истакнатиот американски професор по економија Ричард Вулф.
Минатата среда Брисел се согласи рокот за Брегзит да се продолжи до 31 октомври, со што Лондон дооби уште шест месеци за да најде „најдобро можно решение“ за излегување од блокот.
Меѓутоа, бизнисите во Велика Британија и ширум Европа сакаат оваа „бескрајна ТВ-сапуница“ да се реши, објаснува Вулф.
„Најлошото е неизвесноста околу сето тоа. Никој не знае во кој дел од Европа да инвестира, каде може да се купува и каква заработка би имал“, вели тој.
Во меѓувреме, новиот извештај на ОН за истражувањето „Брегзит без договор: трговски добитници и губитници“ предупредува дека повлекувањето на Велика Британија од ЕУ ќе ја смени способноста на земјите кои не се членки на ЕУ да извезуваат на британскиот пазар“, оставајќи простор за „влез на други играчи“.
Во тој случај, кинескиот увоз во Велика Британија би можело да порасне на 10,2 милијарди долари, а се очекува извозот на САД да порасне за 5,3 милијарди долари.
„Таков исход може да се објасни со фактот дека британските трговски партнери буквално ќе мора да изберат страна во ‘драматичната’ економска и политичка реорганизација“, истакнува професор Вулф.
„Ако ја разбиете Европа, ако Франција или Германија видат дека ќе мора да бираат страна, е јасно во која насока би отишле – со САД и господин Трамп, кого не го сакаат, со уништената Британија која внимателно ја следат, или со ‘новајлијата’ Кина“, вели Фулф.
Можно е да посведочиме драматична реорганизација на светот, политички и економски, бидејќи еден од големите блокови на моќ – Европа – буквално се распаѓа, заклучува економистот.