Во истрагата која се врши по двата терористички напади на бриселскиот аеродром Завентем и бриселската метро станица Малбек, во кои според последните податоци загинаа 31 лице а околу 300 беа повредени, се појави уште една осомничено лице, снимено од страна на безбедносните камери на станицата, заедно со идентификуваниот бомбаш самоубиец Калид Ел Бакрауи.
Белгиските медиуми јавуваат дека полицијата активно трага по лице кое било снимено на метро станицава Малбек непосредно пред експлозијата. Ова лице, засега неидентификувано, носело голема торба и било во друштво на Калид Ел Бакрауи, кој веќе е идентификуван како бомбаш самоубиец во метрото. Полицијата, пак, не сака ниту да ги потврди, ниту демантира овие информации.
„Ова е снимено од страна на безбедносните камери во метрото. Можеме да претпоставиме дека во големата торба се наоѓа експлозив, но не знаеме дали тој торбата ја оставил во возот и после тоа го напуштил, или пак е убиен во експлозијата“, изјавил во четвртокот утрото експертот за контратероризам Клод Монике за белгиската телевизија RTL, додавајќи дека за идентификацијаа на загинатите во метрото е потребно повеќе време, можеби и неколку недели.
Ова е второто осомничено лице по кое белгиската полиција трага во моментов, заедно со лицето во бела јакна и црн шешир, кое може да се забележи на снимката од безбедносните камери на аеродромот Завентем, потсетуваат белгиските медиуми.