Инженер во пензија досега има платено 30.000 фунти од заштедата во „судската битка за правда“ за пишана казна за брзо возење од 100 фунти.
Ричард Кидвел (71) тврди дека „поради правниот систем кој има многу маани“ тој речиси три години се влече по судови и ги потрошил парите што требало да му ги остави на синот во наследство.
Тој тврди дека погрешно му била измерена брзина на движење од 35 милји на час во зона каде дозволената брзина е 30 милји на час, во 2016 година во Ворчестер.
Јавното обвинителство вели дека во случајот се „заплеткани многу проблеми“ што придонесуваат за одолговлекување на судската постапка.
Кидвел, жител на Јејт во Глочестер, тврди дека „сигурно не возел побрзо од 30 милји на час“ на Њу Роуд во ноември, 2016 година.
„Многу бев изненаден кога неколку дена подоцна по пошта добив казна за брзо возење. Навистина не верувам дека возев побрзо од пропишаното. Едно најобично возење се претвори во кошмар“, вели тој.
Кидвел побарал помош од ексерт за електронски видеонадзор кој пред судот рекол дека можно е камерата за сообраќаен надзор да била активирана од автомобил што поминал со голема брзина во соседната лента или дека можеби имала некаков дефект.
Како и да е, Кидвел четири пати одел во судот во Ворчестер пред да му биде прифатена жалбата. Откако го изгубил случајот, се обратил на повисок суд, но изгубил и таму.
Тој вели дека очекувал постапката да оди побрзо, но по речиси три години и потрошени 30.000 фунти, за него уште нема правда.
Кидвел вели дека жали што потрошил толку пари, но дека само сакал да биде задоволена прадата. Неговата правна битка продолжува, со нови експертски докази.
