Британски турист кој се возел со велосипед по Маврово, бил ограбен од три непознати лица, кои потоа го врзале и со автомобил го однеле од таму, но тој се ослободил и стапил во контакт со своите родители во Велика Британија, кои се јавиле во македонската полиција да го пријават случајот.
Како што соопшти полицијата, вчера во 6 часот во ПС Гостивар, од Лондон, Велика Британија, било пријавено дека лицето O.M.J. (32) од Холингтон, Велика Британија, кое било во шума во близина на Ново Село, побарало помош.
Околу 7.25 часот полициски службеници излегле на местото при што, помеѓу каменоломите на магистралниот пат Гостивар-Кичево, на ридот било забележано лицето O.M.J., кој пријавил дека врз него било извршено кривично дело „разбојништво“.
Во вторникот, околу 19 часот, движејќи се на наведениот пат со велосипед, на околу 500 метри од крстосницата за „Бунец“-Маврово, бил запрен од три непознати лица кои му побарале пари. Тој им дал 2.000 денари и две кредитни картички, по што две од лицата заминале за Гостивар, а едното лице останало да го чува.
По половина час двете лица се вратиле, а лицето што го чувало со текстилна лента му ги врзало рацете, го внел во возилото и се упатиле кон Гостивар. Оштетениот, кој бил на задното седиште, успеал да извади нож кој го носел со себе, се одврзал и на едно од лицата му задал неколку удари со ножот.
Напаѓачите го запреле возилото, а оштетениот успеал да ја отвори задната врата и избегал во правец на планината. Оттаму, со неговиот мобилен телефон преку социјалните мрежи успеал да се лоцира, од каде неговите родители од Велика Британија пријавиле во полициска станица.
Се преземаат мерки за пронаоѓање на сторителите и за целосно расчистување на случајот.
