Лондон, 6 септември 2019 (МИА) – Авиокомпанијата British Airways следната недела ќе се соочи веројатно со еден од најголемите штрајкови на пилотите бидејќи одби да ги продолжи преговорите со синдикатот Балпа.
Пилотите најавија штрајк за в понеделник и вторник, како и на 27 септември, поради несогласување околу платите.
Штрајкот би можел да опфати околу 90 отсто од 4.300 вработени во British Airways.
Синдикатот соопшти дека пилотите на британската авиокомпанија првпат стапуваат во штрајк, поради кој 1.600 летови би можеле да бидат откажани следната недела, а тоа ќе загрози неколку илјади патници.
Управата на авиокомпанијата доцна синоќа го одби предлогот на синдикатот да нема штрајк доколку продолжат преговорите.
British Airways не е единствена авиокомпанија која се соочува со штрајк на незадоволните вработени. Ирскиот Ryanair најави штрајк овој месец, а францускиот Air France беше соочен со штрајк во 2018 година, пред да биде постигнат договор.
