Бугарскиот премиер Кирил Петков изјави дека ќе го смени министерот за одбрана Стефан Јанев, откако неговото одбивање да ја нарече руската инвазија војна поттикна повици за негова смена.
Петков рече дека коалициската влада ќе се состане во текот на денот за да гласа за смената на министерот и да предложи нов министер за одбрана. Петков рече дека сите коалициски партнери се согласиле Јанев да биде отстранет.
„Мојот министер за одбрана не може да го користи зборот операција наместо зборот војна. Не можете да ја наречете операција кога веќе се убиени илјадници војници од двете страни“, рече Петков во телевизиска изјава.
„Интересот на Бугарија не е да ја наведнеме главата... Кога ќе видиме нешто со кое не се согласуваме, нешто толку очигледно, не можеме да молчиме“, рече Петков.
Јанев вели дека е мета на напад со конкретна цел
Во објава на Facebook доцна во неделата, Јанев напиша дека бил мета нa напад со конкретна цел, со план да биде заменет со некој кој ќе биде поотворен за одлуки кои им служат на странски интереси и може да ја загрозат безбедноста на Бугарија.
Петков ја критикуваше неговата изјава, велејќи дека ниту еден од неговите министри нема право на „своја надворешна политика, особено не на Facebook“, ниту пак верува дека нивното останување на функција е директно поврзано со стабилноста на владата.
Петков рече дека Бугарија, членка на ЕУ и НАТО, не е принудена да носи никакви одлуки од западните сојузници, но нагласи дека најголемата гаранција за безбедноста на црноморската земја е во единството со другите членки на ЕУ.
Петков беше принуден да објасни во декември дека Бугарија сè уште не разговарала за распоредување на силите на НАТО во земјата како одговор на трупањето руски сили на украинската граница, откако Јанев објави на Facebook дека верува дека такви сили не се потребни.
