Четири лица се убиени во нападот синоќа во трговски центар во местото Берлингтон во северозападната американска сојузна држава Вашингтон каде што властите трагаат по извршителот на нападот.
„Потврдена е смртта на четири лица во трговскиот центар, напаѓачот го напуштил местото на настанот пред да дојде полицијата“, се наведува во соопштението на портпаролот на локалната полиција Марк Френсис објавено на Twitter. Според него, можено е напаѓачот да дејствувал сам, објави локалната телевизија Komo News.
Телевизиската мрежа ABC News, пак, претходно јави дека се убиени три лица. Убиени се три жени и еден маж е животно загрозен, а една жена се здобила со повреди кои не се опасни по животот.
Според локалните медиуми, поради пукањето во трговскиот центар „Cascade Mall“ во Берлингтон, 105 километри северно од Сиетл, кое се случило околу 19 часот по локално време, откажан е фудбалски натпревар во блиското средно училиште и сите се евакуирани.
Полицијата објави дека трага по напаѓачот, кого го опишува како латиноамерикански маж облечен во сива облека и кој последен пат бил забележан како се движи кон блискиот автопат,
„Трагедија вечерва го погоди Вашингтон. Нашите срца се во Берлингтон“, објави на Twitter гувернерот на Вашингтон, Џеј Инсли.
Овој напад доаѓа една седмица откако маж избоде девет лица во трговски центар во центарот на Минесота пред да биде застрелан. Федералното биро за истраги (FBI) тој напад го истражува како можен терористички акт.
Според телевизиската мрежа NBC News, вашингтонската полиција засега не смета дека станува збор за терористички чин во Берлингтон.