На Црногорецот кој непосредно пред терористичките напади од ланскиот 13-ти ноември во Париз беше откриен во Германија со арсенал оружје и експлозиви во автомобилот, му е изречена казна од четири години затвор.
Влатко Вучелиќ, на околу педесетина година, на 5-ти ноември го запрела полицијата на автопатот меѓу Салцбург и Минхен. Навигацискиот систем на неговиот автомобил покажал дека возел од Црна Гора, преку Хрватска и Словенија, како и дека крајната дестинација му била Париз. Полицијата во неговиот „голф“ открила осум автоматски пушки „калашников“, пиштоли, рачни гранати, експлозиви и детонатори.
Поради тоа Црногорецот беше обвинет за транспорт на оружје во Париз заради извршување сериозни, но непрецизирани насилни дела.
Вучелиќ, кој претходно не бил кривично казнуван, признал пред Врховниот регионален суд во Минхен дека бил свесен дека оружјето се наоѓа во неговото возило, но дека немал сознанија за каков и да е планиран напад.
Судот во четвртокот го осуди за незаконско поседување и превезување борбено оружје меѓутоа во соопштението до медиумите било наведено дека „не е докажано дека свесно го превезувал оружјето во Париз поради планираниот напад“.
Пресудата е донесена врз основа на спогодба која се заснова за потполно признание. Судот не успеал да одреди кој го наредил доставувањето на тоа оружје, за што на Црногорецот му било платено со сума од две илјади евра.
Исламистичките милитанти на 13-ти ноември 2015 година во Париз убија 130 луѓе во серија координирани напади со огнено оружје и експлозиви. Дел од оружјето употребено во нападите потекнува од војните водени на територијата на поранешна Југославија во 1990-те години и веројатно од Балканот до француската престолнина стасало преку стари криумчарски патишта.
