Италијанската воена полиција вчера пронашла таен бункер за кој се верува дека го користел Матео Месина Денаро, најбараниот италијански мафијаш, кој беше уапсен во понеделникот по 30 години бегство.
Бункерот се наоѓа во Кампобело ди Мазара, мало гратче на Сицилија каде 60-годишниот Денаро живеел во стан.
Инспекторите го пребаруваат бункерот за документи кои биле во сопственост на Денаро, особено тајната архива на „капо ди тути капи“ на сицилијанската мафија, Тото Риина, кој почина во 2017 година. Според некои доушници од мафијашки кругови, Денаро украл документи кои наводно содржат тајни за мафијашки убиства во последните 40 години, пишува The Guardian.
Обвинителите веруваат дека Денаро има информации за некои од најгрозоморните злосторства извршени од сицилијанската мафија, вклучително и бомбашките напади во кои загинаа судиите Џовани Фалконе и Паоло Борселино и убиството на Џузепе ди Матео, 12-годишниот син на мафијаш кој беше задавен и растворени во киселина.
Во 2002 година, Денаро беше осуден во отсуство на доживотен затвор за убиство, тортура, киднапирање, бомбашки напади, перење пари и трговија со дрога. Денаро е познат по прекарот Диаболик или У Сику (Слабиот), а е роден во Кастелветрано, Сицилија во 1962 година. Неговиот татко беше моќен шеф на Коза ностра и Денаро напредуваше во семејниот бизнис градејќи илегална империја вредна милијарди евра.
Сè уште не е позната функцијата на бункерот
Мафијашките босови во Италија се познати по тоа што градат тунели за бегство под нивните куќи, софистицирани бункери во планините до кои може да се стигне само пеш и скривалишта во шумата кои ги користат кога се во бегство.
Функцијата и големината на бункерот во Кампобело ди Мазара уште не се целосно познати. Да потсетиме, Денаро беше уапсен во понеделникот во клиника во Палермо, каде што се лекувал од тумор.
