Кога е вистинското време да се соопшти радосната вест за бременоста е прашање што си го поставуваат сите трудници.
Некои тврдат дека е најдобро да се почека до крајот на првото тримесечје, додека други не сакаат да чекаат за да ја споделат среќата со сите.
Општото верување е дека трудниците се воздржуваат од споделување на веста до истекувањето на 12-тата недела од бременоста бидејќи според стручњаците тогаш значително се намалува ризикот од спонтан абортус.
Според резултатите од едно истражување објавено на порталот Her.ie, во кое биле вклучени 1.435 мајки, родителите обично не дочекуваат да помине 12-тата недела пред да ја соопштат веста за бременоста.
Истражувањето покажа дека само 26% од мајките „издржале“ да не ја споделат веста за бременоста пред првиот ултразвук.
Една третина од жените одлучиле веста за бременоста да ја споделат со роднините и пријателите веднаш откако и самите добиле потврда, а повеќе од половина тоа го направиле пред истекот на седмата недела.
Препораките на стручњаците се тоа да го направите онака како што вие се чувствувате. Најдобро е сепак веста најпрво да им ја соопштите на најтесното семејство, па на пријателите, а потоа на колегите и на поширокиот круг познаници.
Ако вие и вашиот партнер одлучите никому да не кажувате за бременоста додека и двајцата не сте подготвени за тоа, тоа е ваш избор, особено ако подолго време сте се обидувале да забремените или претходно сте имале спонтан абортус.