За обновата на познатата париска катедрала Нотр Дам, оштетена во пожар, за само два дена се собрани милијарда долари. Но, многумина не се одушевени од ова и реагираат дека е лицемерно што милијардерите можат за два дена да донираат пари со кои би можела да се откорне сиромаштијата и многу деца да бидат спасени од глад.
Многумина реагираа на социјалните мрежи, со еден заеднички заклучок, а тоа е дека станува збор за дволичност. За два дена француските богаташи донираа пари со кои би можеле да бидат спасени илјадници сиромашни деца низ светот.
Никој не го негира фактот дека станува збор за непроценливо историско богатство, но многумина гледаат неправилна распределба на средства. Најчестите критики се однесуваат на фактот дека тројца француски милијардери за помалку од 12 часа собраа повеќе од 600 милиони долари, а со својата акција демонстрираа дека богаташите со леснотија можат да стават крај на гладот, сиромаштијата, недостатокот на здравствена заштита, вода за пиење и образование во сиромашните земји. А, сепак, тоа не се случува.
Луѓето реагираат и за други работи што можат да бидат спречени и нивните реакции наидуваат на поддршка на социјалните мрежи. Кога станува збор за хуманоста, луѓето најмногу го поставуваат прашањето колку вреди еден човечки живот.