Рускиот произведувач на автомобили, AvtoVAZ, во Москва прикажа концепт Lada 4x4 Vision, за кој се верува дека го претставува наследникот на легендарната Lada Niva.
Овогодинешниот саем на автомобили во Москва (29 август - 9 септември), засега донесе неколку интересни премиери.
После новата луксузна руска лимузина, која неодоливо потсетува на Rolls-Royce, и кросовер-купето Renault Arkana, претставен е и концепт за мало теренско возило под назив Lada 4x4 Vision:
Иако AvoVAZ официјално не потврди дека станува збор за возилото кое го најавува наследникот на Lada Niva, сепак се очекува овој концепт да го замени споменатото руско теренско возило, кое со помали промени и поинаква ознака (сега се вика Lada 4x4), се наоѓа на пазарот веќе речиси 40 години.
За изгледот на концептот 4х4 Vision заслужен е шефот на дизајн Стив Мартин, кој ја обликуваше новата генерација на модели на Lada.
Новото теренско возило има карактеристични стилски детали во облик на буквата „X“, кои ги гледавме на сите концепти и сериски модели на Lada во последните неколку години.
Со должина од 4,2 метри, тој е поголем од актуелната Lada (Niva) 4х4 за околу 25 сантиметри, и има 4 врати.
Внатрешноста исто така е значајно модернизирана во однос на старата верзија на познатото руско теренско возило, со два дигитални екрани – еден на местото на инструмент таблата и друг на централната конзола, кои прикажуваат мултимедијални содржини.
Ентериерот на концептот е во сиви и црни тонови, со многу портокалови детали кои ја разбиваат монотонијата и внесуваат живост во кабината на возилото.
Деталите за погонскиот систем не се соопштени, а на фотографиите се гледа дека за пренос на силата на тркалата е употребен автоматски менувач.
Иако AvtoVAZ не ги откри плановите за продукциската верзија, таа најрано би можела да се појави на пазарот во 2019 година.
