Веќе подолго време постои дебатата дали опцијата Dark mode/Night mode може да заштеди батерија кај смартфоните со OLED дисплеј. Google потврди дека тоа навистина е така – Dark mode е спасителот на батеријата на вашиот смартфон.
Разликата кај Dark mode е во тоа што користењето на оваа опција на телефонот помалку го оптоварува дисплејот и поради тоа се троши помалку батерија. Кога на дисплејот се емитува црна боја – тој воопшто не троши батерија бидејќи нема потреба да ги осветлува тие пиксели на екранот.
Google го потврди ова на овогодинешниот самит за Android девелопери, покажувајќи неколку слајдови со споредби на потрошувачката на батерија додека екранот емитува различни бои. За време на тестирањата, компанијата го користеше својот Pixel смартфон.
Според слајдовите, белата боја предизвикува најголема потрошувачка на батерија. Google дури и посочи дека се свесни за фактот дека нивните апликации не се идеални за батеријата бидејќи ја фаворизираат белата боја, но најавија дека тие нема да бидат променетиво блиска иднина.
Компанијата сепак ја препознава предноста на опцијата Dark mode, па затоа во последната година ја имплементираше во неколку од сопствените апликации како YouTube и Android Messages. Оперативниот систем Android ја нема опцијата Dark mode, но може да користи темна тема, која докажано ја штеди батеријата.
