По официјалното повлекување на проблематичните Galaxy Note 7 смартфони и забраната за користење во авионите, компанијата Samsung почна да ги испорачува заменските модели, но повторно се појавија проблеми.
До крајот на минатата недела беа испорачани повеќе од милион заменски уреди во САД, а репарираниот Note 7 треба да има зелена коцка на две места - на заклучениот екран и на врвот на home екранот.
Првичниот проблем на компанијата беше поврзан со прегревањето и експлодирањето на смартфоните, а заменските модели требаше да го решат тој проблем. Сепак, дел од корисниците во Јужна Кореја, повторно пријавија проблеми, а овој пат тие се кај репарираните смартфони. Проблемот сега е во прегревањето и во брзото празнење на батеријата, но според информациите, овој нов проблем не е поврзан со претходниот дефект на батеријата.
Според претстаник на Samsung, станува збор за изолирани случаи и тоа не е поврзано со првичните проблеми со батеријата.
Дел од експертите сметаат дека проблемите со Galaxy Note 7 се резултат на желбата на Samsung да го претстави својот модел пред Apple.