Во услови на пандемија, кога сите посветуваме повеќе внимание на миењето раце, не заборавајте дека и на лицето му треба секојдневно внимание.
Миењето лице не е само дел од вашата секојдневна рутина. Ова е важен чекор во борбата против нечистотијата што може да доведе до предвремено стареење.
Важноста на секојдневното чистење на кожата
„Чистењето на кожата може да биде важен чекор во нејзината заштита“, изјави за HuffPost дерматологот Аријана Шади Курош, доцент на Медицинскиот факултет Харвард. „Особено за нас кои живееме во урбани средини, кожата ни е секојдневно изложена на сонце, зрачење од екраните и хемикалии во воздухот“, објасни таа.
„Сето тоа може да се наталожи на кожата и да ја еродира бариерата на кожата, предизвикувајќи предвремено стареење во форма на брчки и темни дамки. Добриот режим на чистење е важен за да се отстранат овие токсични и иритирачки хемикалии и да се обезбеди чистота за да се нанесат антиоксидантни серуми кои можат да помогнат во заздравувањето на оштетувањата, како и во заштитата на кожата“, вели Курош.
Ако прво не го исчистите лицето, производите за нега на кожата што ги ставате нема да ви донесат ништо добро, велат експертите.
„Без миење, вашата кожа би била покриена со дебел слој нечистотија, што ќе им отежне на другите производи правилно да навлезат во неа“, изјави дерматологот Дајан Дејвис за HuffPost.
„Тоа чувство на затегнатост по чистењето не е добар знак“, предупредува дерматологот Џенифер Дејвид за HuffPost. „Тоа е знак дека вашата кожа е лишена од природните масла и липиди.“
Дерматологот Џошуа Цајхнер, вонреден професор по дерматологија во болницата Маунт Синај, се согласи дека чувството на затегнатост е знак за загриженост.
„Тоа значи дека сте го соголиле надворешниот слој на кожата“, изјави тој за HuffPost. „Кожата треба да ви биде мека и хидрирана по чистењето.“
Лицето треба да се чисти двапати на ден
„Луѓето треба да го чистат лицето двапати на ден, наутро и навечер“, изјави за HuffPost дерматологот Жанет Граф, асистент клинички професор по дерматологија на Медицинскиот факултет Маунт Синај.
Миењето не треба да предизвика болка или шок, затоа не се мијте со мраз студена или многу топла вода.
„Сакате да се стремите кон умереност во времето, интензитетот и температурата“, вели Курош. „Користете млака вода и избегнувајте грубо триење за да спречите иритација.“
Цајхнер се осврна на раширениот мит во кој многумина веруваат: „Целосен мит е дека топлата вода ви ги отвора порите, а студената ги затвора“, рече Цајхнер.
„Нема мускули внатре во ѕидот на вашите пори и тие не се отвораат или затвораат како прозорци. Топлата вода може да предизвика проширување на крвните садови, што доведува до црвенило и влошување на состојбите како розацеа“.
