Единаесет лица, од кои десет деца, вчера беа повредени од удар на гром во Париз, објавија локалните власти.
„Децата биле во паркот Монсо во северозападниот дел од Париз кога ги погодила молскавицата“, изјавил Винсен Балади, заменик градоначалник на парискиот Осми арондисман.
Инцидентот се случил кога за време на прослава на роденден одеднаш почнало невреме со молњи. Уплашените луѓе побарале засолниште под дрвата, што било многу погрешен чекор. Повредените се префрлени во болница, шест дечиња се во тешка состојба.
Неколку региони во Франција издадоа предупредување поради лошите временски прилики во текот на викендот, но меѓу нив не беше Париз.
Удари од гром имаше и во Германија и Полска. Еден човек загина, а неколкумина се повредени од удар на гром во Полска. Во Германија од удар на гром повредени се повеќе од 30 луѓе присутни на детски терен за фудбал. Тројца се здобиле со сериозни повреди и се пренесени во болница.
