Филм
Листа на Time

Десетте најдобри филмови во 2012

7. декември 2012 - 16:10 | М.Т.

Магазинот Time веќе објави неколку листи на кои се наоѓаат работи кои ја одбележаа годинава, од кои веќе ја објавивме листата со песни, а овој пат ја имаме листата со филмови. Еве кои филмови според магазинот заслужуваат да се најдат во топ 10 листата.

10. The Invisible War

Ако некогаш хомосексуалците важеа за најмалтретирани луѓе меѓу војниците, документарецот The Invisible War фрли ново светло на тоа кој е вистински малтретиран во редовите на армијата на САД. Ова е документарец кој обработува чувствителна тема за случаи поврзани со силувањето на жените војници, нешто што се смета за една од најголемите тајни во армијата.

9. Frankenweenie

Кога ќе се спомене името на режисерот Тим Бартон веќе знаете отприлика што да очекувате од неговиот проект. Иако почна да добива бројни критики заради тоа што неговата уметност стана предвидлива, сепак Time го смести анимираниот филм Frankenweenie во оваа листа.

8. Dragon

Режисерот Анг Ли со својот филм Crouching Tiger, Hidden Dragon, го сврте вниманието на целата светска јавност и беше инспирација за азијците да почнат да вложуваат огромни пари во ваквиот тип акциони филмови. Таков беше случајот и со овој филм на Питер Чен.

7. Dark Horse

Иако Dark Horse е драма, на моменти може навистина да ве насмее. Филмот ја третира приказната за еден 35 годишен човек кој уште живее со своите родители и има однесување кое прилега на 12 годишно дете. Додадете на тоа дека ќе се заљуби и всушност добивате приказна за обичниот човек.

6. Zero Dark Thirty

Филмот на Кетрин Бигалоу веќе се најавува како претендент за Оскарите. Американците отсекогаш навивале за филмовите во кои има политичка нота, особено оние поврзани со тероризам, па оваа се вклопува одлично во шемата. Филмот за фаќањето на Осама бин Ладен, крена огромна прашина и тоа на добар начин. Изгледа повеќето станаа свесни дека Бигалоу направила навистина добар филм.

5. The Dark Knight Rises

Откако стивна фамата околу последниот дел на трилогијата на Нолан за Бетмен, можеме конечно да го проанализираме филмот како што треба. Некои велат дека и не бил најдобриот крај кој Нолан можел да го изведе, но факт е дека ова беше најочекуваното филмско парче во текот на оваа година. Доказ за тоа е посетеноста во кино салите.

4. Anna Karenina

Ова беше филм кој долго се очекуваше, главно затоа што екранизациите на книги се посебно тешки за префрлање на филмското платно. Некои велат дека Кира Најтли која ја толкува Ана Каренина во филмот, веројатно ја одиграла улогата на својот живот. Генерално Кира и самиот филм во целост добија огромен број на добри критики.

3. Life of Pi

Нашата публика веќе имаше прилика да го погледне овој филм, кој беше премиерно прикажан во Синеплекс на самиот ден на премиерата. Life of Pi се најавуваше како вистинско филмско револуционерно парче на полето на 3D технологијата. Самите сцени буквално го воодушевуваат човек, што е доказ дека идејата на режисерот Анг Ли да ја екранизира книгата на Мартел била добра, иако требало да вложи големи напори за да го убеди филмското студио.

2. Beasts of the Southern Wild

Магична приказна за едно малечко девојче кое минува низ тежок период од својот живот. Самото дете ќе ве натера да се соживеете со филмот и нејзиниот живот. Ова е еден вид патување, но низ очите на едно дете кое сака да ја раскаже својата приказна.

1. Amour

Полека но сигурно, филмот на Ханеке ги освои срцата на сите. Досега собра едно чудо награди, но тек допрва доаѓа вистинскиот тест за филмот - Оскарите. А оние што го погледнале филмот велат дека, ако членовите на Академијата имаат вкус, несомнено ќе го наградат овој филм.

Коментирај