Чек дис аут

До последниот преживеан: Милионер сака да направи реална игра Last Man Standing на приватен остров

12. април 2019 - 17:25 | А.С.

Приватен остров, сто луѓе, муниција и солиден џекпот – тоа е сѐ што е потребно да се претвори сценарио од видеоигра во реалност. Само еден ќе преживее (секако, не буквално), а главната награда вреди за ризикот. Дали би се осмелиле да играте?

Анонимен милионер сака на остров да направи арена за борба во стилот на видеоиграта Last Man Standing и бара луѓе со авантуристички дух за да го оствари тоа. Поентата на играта е да ги „ликвидирате“ другите учесници и да останете единствениот победник.

Според огласот објавен на HushHush.com, луксузен онлајн пазар за мегабогатите, милионерот бара 100 луѓе кои ќе се борат за главната награда од 100.000 фунти на тридневниот настан.

Играчите ќе бидат опремени со Airsoft пушки (еден вид воздушни пушки), муниција и систем чувствителен на допир за да се осигураат дека играта ќе биде безбедна и фер.

Овој „лов на луѓе“ ќе се одвива по 12 часа на ден во текот на три дена. На организаторите најважна им е безбедноста и ветуваат дека ќе обезбедат храна и секаква потребна опрема, вклучувајќи и кампинг зона.

Покрај доброволци, организаторите бараат и дизајнери кои ќе ја направат арената.

„Овој вид видеоигри станаа многу популарни во изминативе неколку години и нашиот клиент е огромен обожавател кој сака да ја претвориме играта во реалност, на најбезбеден можен начин. Ако шампионатот се покаже како успешен годинава, би сакале да прерасне во настан што ќе се одржува еднаш годишно, што е многу возбудливо“, вели Арон Харпин, основач на HushHush.

„Ако сте обожавател на игри од типот ‘до последниот преживеан’, ова е одлична можност за ункатно доживување во кое може да освоите многу пари. Пред сѐ бараме талентирани дизајнери кои ќе направат сет во кој играта ќе биде уште пореална.“

Крајниот рок за пријавување е  22 април, а апликациите може да се пратат на ОВОЈ ЛИНК.

Коментирај