Стокхолм, 8 октомври 2019 (МИА) – Овогодинешните добитници на Нобеловата награда за физика се научниците Џим Пиблс (Канада), Мишел Мајор (Швајцарија) и Дидје Келоз (Швајцарија) за новите сфаќања на структурата и историјата на Вселената и за откритието на планета која орбитира околу ѕвездите од соларен тип надвор од Сончевиот систем.
Шведската кралска академија на науките денеска соопшти дека половина награда му припаѓа на Киблс „за теориските откритија во физичката космологија“.
Втората половина од наградата е за Мејер и Келоз „за откривање на егзопланета која кружи околу ѕвездите од соларен тип“.
Шведската кралска академија на науките вчера ја додели наградата за медицина, исто така на тројца научници. Вилијам Келин Џуниор (САД), сер Питер Ретклиф (Англија) и Грег Семенза (САД) откриле како клетките се прилагодуваат кога нивото на кислородот паѓа. Тоа е важно откритие за третманите за анемија, па дури и карцином.
За утре е предвидено доделување на наградата за хемија, в четврток за литература, додека добитникот на Нобелова награда за економија ќе биде соопштен в понеделник.
Нобеловата награда за мир ќе биде објавена во петок во Осло, а меѓу фаворитите се активистката против климатските промени Грета Тунберг и премиерот на Етиопија Абиј Ахмед Али, кој склучи мировен договор со Еритреја. Можно е наградата да ја добие и невладината организација „Репортери без граница“.
Паричната вредност на секоја награда е еден милион шведски круни (833.000 евра).