Два авиони на американските маринци паднаа во море во близина на јапонското крајбрежје, објавија светските медиуми.
Најдени се две лица, а пет се водат за исчезнати.
Во соопштението на официјалните служби стои дека се срушиле авиони McDonnell Douglas F/A-18 Hornet и KC-130.
„Инцидентот се случил откако авионите полетале од базата Ивакуни во близина на Фукушима, Јапонија, за да учествуваат во претходно закажаните вежби“, стои во соопштението.
Авионот-цистерна и „ловецот“ на американската војска паднале во околу 2 часот утрото по локално време.
Во соопштението на маринците стои дека авионите паднале на околу 320 километри од брегот, а јапонските служби информираат дека инцидентот се случил на околу 100 километри од крајбрежјето, каде биле најдени двајцата пилоти.
Причината за инцидентот уште не е позната и отворена е истрага. Потрагата по преостанатите членови на екипажите продолжува.