Во источногерманскиот град Дрезден вчера вечерта пред џамија и пред меѓународниот конгресен центар експлодирале две бомби од домашна изработка, но нема повредени, соопшти германската полиција.
„Се работи за две поврзани експлозии во кои никој не е повреден и за нападот до сега никој не презеде одговорност, но ние поаѓаме од сомнежот дека мотивот за нападот е омраза кон странците“, вели шефот на полициската управа на Дрезден, Хорст Кретшмер.
Полицијата смета дека нападите се поврзани и со претстојниот празник Денот на германското обединување, 3 октомври, што следниот викенд ќе се одбележи со пригодна прослава токму во тој град.
На зградите на дрезденската џамија и конгресниот центар причинета е помала материјална штета.
За време на експлозијата имамот со негата сопруга и двата сина биле во џамијата, но не се повредени, а поради експлозијата кај конгресниот центар, евакуиран е кафе-барот на блискиот хотел.
Полицијата ги зајакна мерките на безбедност во близина на институции како исламскиот центар.
Отпорот кон бегалската политика на сојузната влада на Ангела Меркел посебно е изразен на истокот на земјата, каде се забележани бројни напади и подметнати пожари на институции поврзани со бегалците.