Една девојка загина во синоќешниот земјотрес во Босна и Херцеговина кога голема карпа паднала врз нејзината куќа во Столац.
Таа била донесена во болницата во Мостар во тешка состојба и докторите не можеле да ѝ го спасат животот. Нејзините родители биле полесно повредени.
Силен земјотрес синоќа ја погоди Босна и Херцеговина во 23 часот и 7 минути, а епицентарот на потресот бил во Херцеговина, на 15 километри од Столац. Хрватската сеизмолошка служба информира дека земјотресот бил со јачина од 6,1 степени, а ЕМСЦ тврди дека земјотресот бил со јачина од 5,8 степени. Во наредните часови регистрирани се повеќе помали потреси.
Освен во Столац, пријавена е и материјална штета во Мостар каде што се урнал оџак, како и во Љубиње и Чапљина.
Корисниците на социјалните мрежи објавија и фотографии од помали одрони на некои патишта во Херцеговина кои наводно биле предизвикани од потресот.
Синоќешниот земјотрес со епицентар во Босна и Херцеговина беше почувствуван и во Северна Македонија, Црна Гора, Хрватска, Србија, Словенија, Италија и Албанија.
По него, регистрирани се повеќе од 30 земјотреси со послаб интензитет во Херцеговина во текот на ноќта, покажаа податоците на Републичкиот сеизмолошки завод на Србија.
Најсилниот бил утрово во 4:20 часот, кој бил со јачина од 4,4 степени според Рихтеровата скала. Во 2:59 часот бил 4,3 степени, во 2:02 бил 2,6 степени, а во 1:55 бил 2,9 степени според Рихтеровата скала. Епицентрите на сите земјотреси биле кај Столац.
