Citroën го најави концептот Ami One, кој носи потполно нова дефиниција за мобилност и транспорт во урбани средини. Покрај тоа што се работи за електричен модел, негова предност е што може да го возат и луѓе кои немаат возачка дозвола.
Светската премиера на овој компактен автомобил е закажана за Саемот на автомобили во Женева.
Како мал електричен автомобил за две лица, Ami One Concept е дизајниран за урбана мобилност и може да го вози секој со наполнети 16 години, без разлика на тоа дали има положено за возачка дозвола или не. Концептниот модел има максимална брзина од 45 км/ч и домет од 100 километри.
Од компанијата велат дека Ami One е дизајниран како алтернативна опција во однос на јавниот превоз како што е автобусот, трамвајот и метрото, па и другите превозни средства на тркала, како велосипеди и скутери. Со вкупна тежина од 425 килограми, овој концепт спаѓа во сегментот на лесни превозни средства, а со должина од 2,5 и ширина од 1,5 метри, тој е екстремно компактен.
Возачите ќе му пристапуваат на овој автомобил преку нивните смартфони. Вратите се отклучуваат и заклучуваат со помош на QR код на алуминиумската база на кваката на вратата. Кога ќе влезат внатре, возачите го поврзуваат телефонот со автомобилот и тогаш може да почне комуникацијата помеѓу Ami One и возачот.
Францускиот производител Citroën не можеше да го одбележи 100-от роденден на подобар начин. Со објавата дека концептот Ami One ќе се појави на Саемот во Женева, компанијата ги израдува големиот број фанови низ светот.