Турција нема да се откаже од договорот со Русија за купување на ракетниот систем S-400, изјави турскиот претседател Реџеп Тајип Ердоган.
Во неговото обраќање до новинарите во руското одморалиште Сочи каде се одржа самитот на Русија, Турција и Иран за Сирија, тој нагласи дека Анкара ќе продолжи понатаму со набавката на системот S-400.
„Склучивме договор за купување на S-400 од Русија, така што е неоспорно дека ќе се држиме до него. Тоа е веќе решено“, рече Ердоган.
Тој додаде дека Турција е отворена за купување на противвоздушниот систем Patriot од САД, ако тоа е во интерес на Анкара, но напомена дека има спорни прашања околу испораката и производството за кои треба допрва да разговара со Вашингтон.
Турција во повеќе наврати наведе дека е посветена на купување на рускиот противракетен систем, покрај предупредувањата од НАТО дека S-400 не може да биде интегриран во постоечкиот противвоздушен систем на Алијансата.
Американски официјални преставници го одредија 15 февруари како неформален временски рок во кој Анкара треба да одговори на конкурентската понуда од Вашингтон и дека ако Турција продолжи со купувањето на S-400, Вашингтон ќе ја повлече својата понуда за продажба на ракетниот систем Patriot вредна 3,5 милијарди долари.
Тие исто така истакнаа дека ќе биде загрозено турското набавување на борбените авиони F-35 од компанијата Lockheed Martin и дека САД најверојатно ќе воведат санкции за Анкара.