На аеродромот во Ница се одвива евакуација на патниците, пренесува дописникот на агенцијата Associated Press од местото на настанот.
„На патниците им кажаа да излезат од аеродромот во Ница“, јавил дописниот. Според него, еден од терминалите е блокиран од војската.
Причината за евакуацијата е сомнителен куфер, објави американската телевизија Fox News.
Пакет оставен од еден од патниците е причина за евакуацијата на сите патници од зоната каде што се подигнуваат багажите на аеродромот во Ница, објави на Twitter дописникот на канадскиот јавен сервис CBC, кој исто така бил на аеродромот.
Според него, пак, кордонот од аеродромот е веќе отстранет, а пред аеродромската зграда се само луѓето кои не го добиле својот багаж.
Во Ница, како и ширум Франција, покрај највисокото ниво на терористичка закана, се спроведуваат дополнителни безбедносни мерки, по терористичкиот напад во овој јужен приморски град.
Напаѓачот е идентификуван како 31-годишниот Мухамед Лауееџа Булел, по потекло до Тунис, од градот Мсакена, десетина километри од градот Сус, каде што минатата година џихадистите извршија смртоносен напад врз туристи во хотелски комплекс при што беа убиени триесетина странци.
Булел бил оженет и татко на три деца. На француските власти им бил познат по прекршоци и како насилник, но не бил доведуван во поврзаност со радикали. И на туниските власти не им бил познат по радикални и исламистички ставови, изјави во петокот за Reuters извор од туниските безбедносни структури.