„Евакуацијата на импровизираниот камп со имигранти и беглаци кај грчкото место Идомени, во непосредна близна на границата со Македонија, се одвива полека и мирно“, изјави Јоргос Крицис, портпарол на грчката служба за управување со миграциската криза.
„Операцијата започна изутрина во 6 часот и се одвива во бавен ритам и во тишина. Операцијата ќе трае неколку дена. Досега не беше потребно да се употреби сила“, изјави портпаролот за грчката државна телевизија кој вчера тврдеше дека евакуацијата на кампот со околу 8.400 лица би требало да трае најмалку десет дена.
На новинарите не им беше дозволен пристап во кампот. Полицијата го блокираше патот три километри пред локацијата. Емитувани се снимки од четири автобуси кои доаѓаат во логорот за да ги преземат имигрантите.
Најмалку 700, а можеби и до 1.400 полицајци, ќе бидат ангажирани во оваа операција, изјавиле полициски извори за AFP. Четири автобуси со околу 400 имигранти, веќе го напуштиле кампот кај Идомени утрово, додал истиот извор.
Пред започнување на евакуацијата, кампот го надлетуваа полициски хеликоптери, како што е објаснето, за да добијат преглед на ситуацијата и пренесувале директно снимки во полицискиот штаб кој раководи со операцијата, пренесува агенцијата DPA.
Според плановите на грчките власти, имигрантите би требало да се преместат во центар за прифаќање во близина на Солун.
Повеќето од заглавените беглаци одбиваа да се преселат во други капацитети за нивно сместување на грчка територија, а неколкупати се обидоа илегално или насилно да ја минат македонската територија при што имаше и жртви и настрадани.