Европскиот парламент ја поддржа употребата на канабис во медицински цели по расправата за можни злоупотреби на медицински оправдани терапии.
Европратениците ги повикуваат Европската комисија и властите на земјите членки на ЕУ да дефинираат што е медицински канабис, да ги спречат злоупотребите и да обезбедат финансиски средства во новата програма за истражување на терапевтските својства на канабисот.
Државите во кои медицинскиот канабис е легален често имаат проблеми со условите за пристап, препишување и купување на овој производ.
Некои европратеници сметаат дека со сеопфатна регулација на лековите на база на канабис би се ограничил црниот пазар и би се гарантирал квалитет на производите.
Исто така, би се ограничил и пристапот на малолетници до канабисот и би се овозможила правна сигурност и пристап на пациентите кои канабисот би го користеле во медицински цели, со посебни мерки на претпазливост за помлади лица и за трудници, стои во донесената резолуција.
Пратениците сметаат дека има задоволувачки докази според кои канабисот има терапевтски својства во лечењето на хронична болка кај возрасни и дека ги ублажува тегобите, мачнините и повраќањето предизвикани од хемотерапија, како и симптомите на спазмичност кај пациенти со мултиплекс склероза, а исто така го поттикнува растот на коските.
Некои европратеници кои се по професија лекари, предупредуваат дека треба да се обрати внимание на две екстреми – мора да се делува против стереотипните тврдења дека канабисот е нелегална и опасна дрога, а од друга страна да се внимава пациентите да не почнат да користат канабис секогаш кога нешто ќе ги заболи.
Вера Јурова, еврокомесарка на Комисијата за заштита на потрошувачите, најави дека ќе продолжат истражувањата за терапевтските својства на канабисот.
Кога станува збор за канабисот и негово слободно користење, најлиберални земји во ЕУ се Холандија, Шпанија, Португалија, Германија и Чешка.