Претседателката на Европската централна банка, Кристин Лагард, побара од 19 експерти од членките на Еврозоната, по еден од секоја земја, до 2024 година да изберат нов дизајн на банкнотите на еврото.
Новиот дизајн ќе биде изработен од панел советници составен од експерти од многу области - од уметници и дизајнери до физичари и археолози, а банкнотите ќе го променат својот изглед за да станат подостапни за Европејците од сите возрасти и култури, пренесува британски The Telegraph.
Откако панелот ќе осмисли нови визуелни решенија, ЕЦБ ќе ги стави на јавна дискусија. Следува конкурс, по што ќе се одржат дополнителни консултации, а конечната одлука за изгледот на новите евро банкноти ќе ја донесе Управниот совет на ЕЦБ, органот кој вообичаено носи одлуки за каматните стапки и слични прашања.
Одлуката за редизајнот доаѓа откако одлуката на ЕЦБ за можноста за имплементација на новото дигитално евро загрижи многумина и потенцијално сигнализираше смрт на физичките пари.
Лагард нагласи дека банкнотите нема да бидат укинати.
„Банкнотите остануваат. Тие се тактилен и видлив симбол на заедничка Европа, особено во време на криза, и сѐ уште се многу барани. После 20 години, време е да го ревидираме изгледот на нашите банкноти со цел да ги направиме подостапни за Европејците од сите возрасти и култури“, рече Лагард.
Во моментов во оптек се 27,6 милијарди банкноти евра во вредност од над 1,5 билиони евра.
Најмногу се банкноти од 50 евра, од кои 13,4 милијарди, потоа следат банкнотите од 20 евра, од кои 4,5 милијарди. Банкнотата од 100 евра има 2 милијарди, а исто толку банкноти од 10 и 5 евра. Банкнотите од 200 и 500 се поретки и од секоја има по 1 милијарда.
Централните банки на земјите од Еврозоната престанаа да издаваат банкноти од 500 евра во 2019 година, бидејќи постоеше страв дека криминалците ќе ги искористат за ефикасно пренесување на големи количини готовина.
