Компанијата на Марк Закерберг изминативе месеци го менува начинот на работа на Facebook, а како дел од измените би можело да се најде и новата опција Unsend за апликацијата Messenger, која веќе почна да се тестира кај повеќе корисници.
Во почетокот на оваа година Facebook тајно ги избриша старите пораки кои преку Messenger ги испрати основачот и директор на компанијата, Марк Закерберг. Тоа беше многу невообичаено бидејќи „обичните“ корисници на Facebook не можеа да го направат истото.
Во моменталната форма на Facebook и Messenger, можете да избришете порака од вашиот разговор со некого, но таа ќе биде избришана само од вашето видно поле. Пораката ќе продолжи да постои во разговорот и ќе остане во приемното сандаче на личноста на која сте ѝ ја испратиле.
Воведувањето на опцијата Unsend беше соопштено уште во април, но не беа дадени детали ниту датуми за новата измена на Messenger апликацијата. Сепак, таа започна со тестирање, што беше и потврдено од страна на Facebook. Опцијата во моментов се тестира интерно и кај пробни корисници, а кога од компанијата ќе се уверат дека таа работи без проблеми ќе ја направат достапна за сите корисници.
Опцијата Unsend веројатно ќе биде достапна само одредено време откако корисниците ќе испратат порака. Таа ќе може да биде избришана, со што ќе исчезне од разговорот помеѓу двајцата корисници.