Научно-фантастичниот 3Д блокбастер „Avatar“ на Џејмс Kамерон, кој на светските кино благајни за месец дена заработи 1,6 милијарди долари утрово ги освои Златните глобуси за најдобар филм и режија, со што најави дар-мар на престојните доделувања на најпрестижните статуетки во филмската индустрија - Оскарите.
За Џејмс Kамерон ова е реприза од доделувањето на глобусите од пред 12 години, кога за својот „Titanic“ беше награден за најдобар филм во категоријата на драми и режија.
„Аватар бара од нас да погледнеме како е се поврзано, сите човечки суштества меѓусебно и ние со Земјата. И ако морате да патувате четири и пол светлосни години до некоја измислена планета за да го цените ова чудо од свет кое го имаме овде, тогаш знаете дека се работи за чудо од филм, за магија“, изјави Камерон благодарејќи за наградата.
Ѕвездата на филмот „Crazy Нeart“ Џеф Бриџис го доби својот прв Златен Глобус во кариерата за главна машка улога во драма, а во соодветната категорија кај жените триумфираше (исто така за прв пат) Сандра Булок за својата работа во филмот „The Blind Side“.
Во категоријата на комедиите/мјузиклите лауреатите беа: Роберт Дауни Јр. (главна машка улога, „Sherlock Holmes“), Мерил Стрип (главна женска улога, „Julie & Julia“), Мо'ник (споредна женска улога, „Precious“) и Кристоф Волц (споредна машка улога, „Inglorious Basterds“). Во оваа категорија за најдобар филм беше избран „Hangover“.
Најдобар анимиран филм е „Up“, Златен Глобус за најдобро сценарио освои „Up In The Air“, најдобрата оригинална музика ја направи Мајкл Џакино („Up“), а најдобрата песна ни доаѓа од филмот „Crazy Нeart“ - „The Weary Kind (Theme From Crazy Heart)“ oд авторите Рајан Бингам и Ти Боун Бурнет.
Сесил Б. ДеМил наградата за особен придонес во шоу бизнисот му припадна на легендарниот режисер Мартин Скорсезе.
Сите победници по категории може да ги видите - тука.
Церемонијата ја водеше познатиот британски комичар и актер Рики Џервејс кој за цело време покажуваше нагласен провокативен тон кон професијата во целина и одредени колеги, нешто што собраната холивудска елита го проследи со воздржано смешкање и аплауз, покрај многуте кисели насмевки.
Eве ги најинтересните моменти од „шоуто на Рики“ :)
Многу од добитниците и презентерите на 67. доделување на Златните Глобуси носеа црвени и жолти машнички, како потсетување на катастрофалниот земјотрес на Хаити, и повикуваа на финансиска помош за настраданите.
Погледнете ја фотогалеријата од црвениот тепих.
