Откако предизвика масовна хистерија и ги наполни (или поточно, преполни) кино благајните, “Аватар“ од викенов не е повеќе на првото место на гледаност во САД и Канада.
По седум недели најголема заработка на бокс-офисот, “Аватар“ падна на второто место, заработувајќи “само“ 23,6 милиони долари минатиот викенд. Филмот кој го “избрка“ Аватар од тронот е романтичната драма “Dear John“ која за првиот викенд на прикажување заработи 32,4 милиони долари.
Инаку “Аватар“ досега има заработка од 630 милиони долари, што го прави филм со најголема заработка во историјата на Холивуд.
Овој филм, на неодамнешната церемонија на номинирање за Оскарите доби девет номинации, меѓу кои и онаа за најдобар филм и најдобар режисер. За кои категории ќе ја понесе златната статуетка, останува да дознаеме на доделувањето на Оскарите кое ќе се одржи на 7-ми март.
И.Е. | Кајгана
