Филмот на Квентин Тарантино „Inglorious Basterds“ за Втората светска војна во саботата се закити со наградата на Американската заедница на филмски и тв-актери.
Screen Actors Guil (SAD) наградите се солидни показатели за Оскарите, особено кога се во прашање последните две години. Имено, минатите две доделувања наградата за најдобар филм ја однесоа „Slumdog Millionaire“ на Дени Бојл и „No Country for Old Men“ на Џоел и Итан Коен.
Ова истото му појде од рака и на последното остварување на Тарантино, со што овој филм, заедно со „Avatar“ (кој го ќари Златниот Глобус за најдобра драма) излегува во прв план за освојувањето на статуетката за најдобар филм. Во врат им дише „The Hurt Locker“ на Кетрин Бигалоу.
Кристоф Волц за улогата на германскиот офицер меѓу „немилосрдните копилиња“ ја доби наградата за најдобра споредна улога, а исто така по примерот на „глобусите“ наградата за најдобар актер ја освои Џеф Бриџис („Crazy Heart“), а меѓу актерките приматот го доби Сандра Булок („The Blind Side“).
Доделувањето на Оскарите ќе се одржи на 7. март, a oфицијализирањето на номинациите ќе се случи на 2. февруари.
