Најлошото од Холивуд за годината и декадата

Веќе три децении “Златна малина“ им го покажува местото на дигнатите холивудски глави. Така, и овојпат не' почести со список на “Најлошото од Холивуд“ на кој блеснаа Меган Фокс и “традиционалниот“ Еди Марфи.

Ден пред објавувањето на номинациите за Оскар, објавени се имињата на номинираните за “Златна Малина“ - достигнување кое годинава ќе оддаде признание и на оние кои цели десет години се трудат да бидат меѓу најлошите. А, затоа што ја цениме нивната посветеност, прво ви ги пренесуваме филмските и актерски промашувања на деценијата.

Во категоријата најлош филм на деценијата се номинирани Battlefield Earth на Џон Траволта, Freddy Got Fingered на Питер Грин, Gigli со Бен Афлек и Џенифер Лопез (океј, и Ал Пачино, за наша голема жал), I Know Who Killed Me со Линдзи Лохан и Swept Away на Мадона.

Што се однесува до актерските остварувања, Бен Афлек и Џон Траволта се номинирани за најлоши глумци на деценијата, а во категоријава им прават друштво и Еди Марфи, Мајк Маерс и Роб Шнајдер. Овие номинации кај женскиот пол припаднаа на Линдзи Лохан, Џенифер Лопез, Мадона, Мараја Кери и Парис Хилтон.

Џон Вилсон, основачот на овие кул анти-награди, смета дека фаворити за титулата не-талент на деценијата се Хилтон и Лохан во женска, а Еди Марфи во машка конкуренција.

На годишно ниво, односно изминатата година најуспешен FAIL момент имаа следниве филмови и актери:

Водечки по бројот на номинации (дури седум) се филмовите Transformers: Revenge of the Fallen кој  добро ги наполни кино благајните и лузерот Land of the Lost. Меѓу останатите “епитети“ се закитија и со номинација за најлоша глума, благодарение на Меган Фокс и Вил Фарел.

Останатите кои се борат за титулата најлош филм се: романтичната комедија All About Steve со Сандра Булок, акцискиот филм G.I Joe: The Rise of Cobra и комедијата Old Dogs со Робин Вилијамс и Џон Траволта.

Сандра Булок си заработи и номинација за најлоша глумица со All About Steve. Иронијата е во тоа што се претпоставува дека оваа актерка ќе биде номинирана за Оскар за улогата во хит драмата The Blind Side која веќе и донесе Златен глобус.

Мајли Сајрус со улогата во Hannah Montana: The Movie исто така се најде меѓу номинираните за Златна Малина, а друштво и прави нејзиниот татко со споредната улога во споменатиот филм.

Jonas Brothers братски си ја поделија номинацијата за најлош глумец во Jonas Brothers: The 3-D Concert Experience.

И The Twilight Saga: New Moon не остана без “почести“. Роберт Патинсон е номиниран за најлош спореден глумец, а со партнерката Кристен Стујарт успеаа да одглумат доволно “добро“ за номинација во категоријата најлош филмски пар.

Во категоријата најлош актер пак, ќе се води битка помеѓу Вил Фарел и неговата улога во Land of the Lost, браќата Џонас, Стив Мартин во The Pink Panther 2, Еди Марфи за Imagine That и Траволта за улогата во Old Dogs.

Секси глумицата Меган Фокс е повеќе секси отколку глумица според улогите во Revenge of the Fallen и Jenifer's Boody, со кои си заработи номинација за најлоша актерка. Во конкуренција за оваа категорија, покрај веќе споменатите Булок и Сајрис ќе се најдат и Бејонсе за улогата во Obsessed и Сара Џесика Паркер за Did You Hear About the Morgans?

Конечните добитници на Golden Raspberry Awards (или како што “нагалено“ ги викаат The Razzies) ќе бидат објавени на 6. Март, ноќтта пред доделувањето на Оскарите, најави Џон Вилсон - човекот на кој сме му исклучително благодарни што на светот му подари ваква кул манифестација.

И.Е. | Кајгана