Овогодишното доделување на Златните глобуси ќе покаже дали „Avatar“ е само финансиско чудо во филмската индустрија или е способен да освојува и престижни награди. Освојувањето на Златниот глобус не е најпрестижната награда, но на сите им е добро познато дека е најпрецизниот индикатор за тоа како ќе поминат наградите над сите награди - Оскарите.
Најотворена сезона досега
Филмот кој со секој поминат ден е се поблиску до „Titanic“ на листата на заработувачка, е главниот фаворит во очи на 67. свеченост на доделувањето на Златните глобуси. Номиниран е во четири категории, вклучувајќи ја и онаа за најдобар филм. „Жирито на Глобусите се состои од странски новинари кои мислат дека нивната работа е да најдат нешто интересно, ново. Моментално, нема ништо поинтересно од последниот филм на Џејмс Камерон“, смета Том О'Нил од ЛА Тајмс. Саша Стоун кој го води блогот посветен на наградите „Awards Daily“, смета дека оваа сезона е „најотворена досега“.
Организацијата на странски новинари во Холивуд, тврди тој, најчесто преферира интимни драми, а не научнофантастични спектакли. „Но „Avatar“ е толку емотивен што би можел и да им се допадне“, изјави Стоун.
Мерил Стрип оди по седмиот Глобус?
Во категоријата за најдобра актерка интересен ќе биде дуелот меѓу Мерил Стрип и Сандра Булок - и двете имаат по две номинации. Булок е номинирана за најдобра актерка во категориите драма и комедија, додека Мерил има шанси да го освои својот седми Златен глобус со две номинации во категоријата комедии за филмовите „Julie & Julia“ и „It's Complicated“.
Џорџ Клуни е еден од фаворитите за најдобра драмска машка улога во филмот „Up In The Air“, но некои критичари сметаат дека Џеф Бриџис во филмот „Crazy Heart“ ја остварил изведбата на неговата кариера па се очекува дека жирито најмногу ќе се двоуми меѓу овие актери.
Maлтретирањето е во мода
Во категоријата за најдобра споредна актерка фаворит е познатата комичарка Mo'Nique која ја воодушеви филмската критика со бравурозната изведба во филмот „Precious“ каде глуми мајка која ја злоставува својата ќерка тинејџерка. Сепак, нејзината победа не е сигурна, бидејќи покрај неа номинирани се и одличните Пенелопе Круз, Џулијан Мур, Ана Кендрик и Вера Фармига.
Најдобриот спореден актер е исто така категоријата во која не се очекуваат големи изненадувања. Се смета дека Кристоф Волц во улогата на садистичкиот, манипулативен и лукав СС-овец во „Inglorious Basterds“ реализираше една од најдобрите споредни улоги во историјата на филмот. Покрај него номинирани се и Мет Дејмон, Вуди Харелсон, Кристофер Пламер и Стенли Тучи.
Доделувањето на статуетките е во понеделник во 02:00.
